Saturday, July 20, 2019

150 KA TIMBANGAN NGA WALAY SELYO, GIKOMPISKA SA LPCC -ILIGAN

(Biyernes, Ika-21 sa Hunyo 2019)

 

NASAKMIT sa Local Price Coordinating Council (LPCC) sa dakbayan sa Iligan ang 150 ka mga timbangan nga tampered ug walay balido nga 2019 sticker. Kini gihimo karong adlawa Biyernes, Hunyo 21 didto sa temporaryong merkado sa IBJT Tambo, Central Market, Barangay Santiago Talipapa ingon man sa mga junkshop sa nasangpit nga barangay. Gihimo ang maong Operation Timbangan aron i-seguro ug protektahan ang katungod sa mga konsumante sa pagpalit sa eksaktong timbang sa ilang mga ginapalit nga produkto diha sa kamerkadohan. Tubag usab kini sa mahinungdanon nga gidaghanon sa mga verbal nga mga reklamo gikan sa mga konsumante. Tumong usab sa maong kalihokan nga mabati sa mga konsumante ang aktibo nga presensya sa gobyerno sa pagpanalipod kanila gikan sa mga negosyante. Gipangulohan ang Opeartion Timbangan sa Permits and License Division sa City Mayor’s Office uban sa mga nagkadaiyang ahensiya sa gobyerno sama sa DTI, PNP, BFP, NFA, CHO, CAG, EEDMO, PSA, CIO, CAD, CPO, OCV, FDLO, LHI, PIA, ug sa ubang ahensiya sa gobyerno.

 

Maricris Jumalon Tumimbang / CIO