Saturday, July 20, 2019

320 STUDENTS, POSIBLENG MAKAPAHIMULOS SA LIBRENG PAGTUNGHA SA “COLEGIO ILIGAN” KARONG TUIGA

(Miyerkoles, Ika-20 sa Marso 2019)

 

POSIBLENG makapahimulos ang 320 ka mga kabatan-onang kabos diri sa dakbayan alang sa libreng pagtungha sa kolehiyo sa pagbukas sa “Colegio Iligan” karong Agosto 1, ning kasamtangang tuig. Gipamahayg kini ni Rolando Quizon, ang Chief of Staff ni Bise Mayor Jemar Vera Cruz atol sa pagpangulo niini sa 2nd public hearing kagahapon sa Sangguniang Panlungsod Session Hall. Sumala ni Quizon, upat ka mga kurso ang paga-ablihan sa lokal nga kagamhanan ug mao kini ang: Criminology, Midwifery, Agriculture ug Social Works. Ug paga-ablihan na ang enrolment karong bulan sa Hunyo alang ngadto sa mga kabatan-onang kabos ug indigent. Gibutyag sa opisyal nga tulo ka area sa Iligan ang ginapilian pa lamang aron temporaryong buhatong classrooms samtang wala pa masugdan ang pagtukod sa mismong building sa nasangpit nga tulunghaan. Usang gipilian mao ang ICNHS (City High), Boy Scout Building nga nahimutang taas sa Unitop ug sa Rooftop sa Poblacion Market. Dugang ni Quizon nga padayon pa ang komunikasyon ug koordinasyon sa Local School Board ngadto sa Commision on Higher Education (CHED) alang sa pagtukod sa Colegio Iligan aron mabuhatan og program of works sa City Engineer’s Office, City Planning & Development Office aron hingpit na kining matukod sa dakbayan.

 

Maricris Jumalon Tumimbang / CIO