Friday, February 28, 2020

MANDO NI MAYOR REGENCIA SA LPCC HUGTAN ANG PAGMONITOR SA PRESYO SA FACE MASK

(Martes, Ika-7 sa Pebrero 2020)

 

CITY MAYOR’S OFFICE —Sa tinguha nga masulbad ug masumpo ang dili makatarunganong pagtaas sa presyo ug pagkahurot sa face mask sa mga pharmacies ug mga grocery stores sa dakbayan sa Iligan, gimando ni  Iligan City Mayor Celso G. Regencia sa Local Price Coordinating Council (LPCC) Iligan uban sa Department of Trade and Industry (DTI) ang hugtanong pagmonitor sa presyo sa face masks ug sa ubang medical supplies dinhi sa dakbayan, kini kalabot sa Novel Corona virus (2019-nCOV) nga naghatag og dakong kahadlok ug kabalaka sa katawhan dili lamang sa Iligan apan lakip sa tibuok kalibutan.

Sa gipahigayong Emergency Price Monitoring nga gimugna sa LPCC niadtong Pebrero 3, 2020, Kuwarenta (40) ka mga botika sa tibuok siyudad ang gisusi ug nasubay sa team ug napamatud-an, sa mga drugstores nahutdan og suplay sa face mask. Ang gagmay o dagkong mga botika karon wala’y suplay sa mga face mask ilabina ang klasi sa face mask nga N95 og nagbutang pa sila’g timaan sa kilid sa ilang botika nga wala’y stocks ang facemask.

Gipatin-aw pa sa mga empleyado sa mga botika, sumala pa ang kakulangon sa suplay sa face mask nagsugod pa lamang tungod sa pagbuto sa bulkang Taal ingon nga, daghang gipalit ug gipadala sa Manila o Batangas isip bahin sa mga relief goods ug pagtabang sa mga evacuees samtang ang pipila nga mga indibidwal nagpalit usab og face mask sugod migawas ang 2019 Novel Coronavirus ug nagpalit 20 hangtod 50 ka kahon ug gipadala sa mga paryente sa Manila o sa gawas sa nasod, tungod wala na sila’y magamit og mapalit nga mga face mask.

Gipamatud-an usab sa pipila ka mga empleyado sa parmasya nga naghulat pa sila sa delivery sa face mask ug uban pang mga gamit  medikal sama sa 70% alkohol, surgical gloves, nebulizer, nebulizing kit ug  N95. Samtang, Gipasalig ni Roel Paclipan, Provincial Director sa DTI-Lanao del Norte  nga padayon nga bantayan nila ang presyo sa face mask ug sa ubang medical supplies aron dili mapahimuslan sa ubang mga negosyante ang kahimtang.

Gipasabot usab sa City Health Office (CHO) pinaagi usab sa advisory sa Department of Health (DOH) nga angayan lamang mogamit og face mask kadtong mga nag-chemotherapy tungod sa cancer, nag-dialysis, HIV patients ug mga adunay suliran sa immune system. Gani man, gipasabot sa advisory nga angay lamang batonan ang kahinlo sa panlawas, kanunay nga paghugas og kamot, paglikay (usa ka dupa nga distansya) sa mga tawo nga adunay ubo ug sip-on ug pagbaton og healthy lifestyle aron malikayan ang virus. Subay niini, naghangyo ang mga health officials sa City Health Office sa katawhan  nga dili mag-panic o mabalaka ug mas angayan unta hatagan og prayoridad ang mga pasyente ug mga health providers sa pagamit sa masks.

 

Maricris Jumalon Tumimbang / CIO