Saturday, June 24, 2017

DEP-ED SUPERENTINDENT SA ILIGAN DILI SUPAK SA PAGGAMIT SA TOGA SA GRADUATION

(Miyerkules, Ika-15 sa Marso 2017)

 

DILI did-an ni DepEd School Superentindent Randolf Turtola ang mga tulunghaan nga maggamit ug toga sa mga mo-graduar nga estudyante sunod bulan sa Abril. Kini taliwala sa kamando-an sa rehiyonal nga buhatan sa Dept. of Education nga gidili na ang paggamit sa toga panahon sa graduation. Sumala pa ni Mr. Turtola nga uyon siya sa maong kamando-an apan dili usab niya mapugngan kun buot gayod sa mga ginikanan nga pasul-ubon ug toga ang ilang mga anak kun mopaso sa ilang graduation ceremony.

Midugang pa si Mr. Turtola sa pag-ingon nga duna say petition ang Parent Teachers Association kun PTA nga supak sila sa plano sa rehiyonal nga buhatan sa DepEd nga wagtangon ang na-andan nga pamaagi sa pag-graduar nga mogamit ug toga. Sumala pa nga ang paggamit sa toga maoy dakong handumanan sa mga kabataan nga mograduar sa ilang tagsa-tagsa ka ang-ang sa pagtungha. Apan gisugyut ni Mr. Turtola nga unta likayan ang paggasto ug dako panahon sa graduation tungod kay dili tanang ginikanan dunay salapi nga ikagasto.

 

– – – Bobby Capangpangan / City Information Office

###