Tuesday, November 30, 2021

DILG MIPASIDAAN SA TANANG ESTABLISYEMENTO NGA TUMANON ANG TANAN NGA MGA PANUDLO ILAWOM SA ALERT LEVEL SYSTEM

(Biyernes, Ika-19 sa Nobyembre 2021)

 

Gipasidan-an karon sa Department of the Interior and Local Government (DILG) ang tanan nga mga establisemento nga dili motuman sa Minimum Public Health Standards (MPHS) ug uban pang mga panudlo ilawom sa Alert Level System nga mahimong tangtangon ang ilang Safety Seals o masuspinde ang ilang mga business permit tungod sa paglapas o sa dili pagsunod sa Covid -19 health protocols o regulasyon.

Sigon sa DILG nakadawat sila ug daghang mga reklamo gikan sa publiko bahin sa paglapas diha sa kapasidad sa operasyon ug kapakyasan sa pagpatuman sa rekisitos nga ang mga vaccinated lamang nga mga indibidwal ang makasulod sa mga establisyemento nga gitugotan mag-operate sama sa mga restawran, amusement park, mga lugar sa kalingawan (recreational activities), fitness studio, gym, ug uban pa.

Sumala pa, adunay mga restawran ug mga indoor establishments nga wala mag-check sa vaccination status sa ilang mga customers, ug nakalapas sa 50% operational capacity alang sa indoor establishments, ug 70% operational capacity sa mga outdoor establishments.

Matod sa ahensiya, kini nga mga establisemento hugot nga gipasidan-an nga bawion sa gobyerno ang Safety Seals nga gi-isyu kanila nga mao ang maghikaw kanila sa dugang nga 10% nga kapasidad sa operasyon ingon man mawad-an sa badge of honor nga sila nagsunod sa tanan nga mga sumbanan sa panglawas sa publiko batok sa COVID-19.

Dugang pa sa DILG nga sa mga repeat violators o kadtong walay Safety Seals, i-rekomendar sa DILG nga i-revoke ang ilang business permit nga gi-isyu sa Local Government Unit.

Gihangyo sab sa DILG ang LGU ug Philippine National Police (PNP) nga mohimo ug dugang inspeksyon sa mga establisemento aron masiguro ang pagsunod sa Covid-19 guidelines ug ang LGU usab mag-isyu og Show Cause Orders batok sa mga malapason.

 

Maricris Jumalon Tumimbang / CIO