Wednesday, May 22, 2019

DOH, NAG-ABISO SA PUBLIKO BATOK HEAT STROKE

(Huwebes, Ika-14 sa Marso 2019)

 

NAG-ABISO karon ang Department of Health (DOH) batok sa peligrong dala sa heat stroke, nga kasagara ug posibleng masinati atol sa kainit sa panahon kun dry season. Sumala ni Health Secretary Francisco Duque III, kinahanglan kaayo ang pag-inom og daghang tubig aron mahilikay sa heat stroke ang usa ka indibidwal hilabi na ang mga bata ug katigulangan. Sigon sa DOH, ang heat stroke usa ka emerhensiyang medikal nga diin ang temperature sa lawas miabot na sa pinakataas nga level nga 40 degree Celsius ug usa sa hinungdan niini mao ang makanunayon ug dugay nga pagbulad sa kainit sa adlaw. Posibleng mahimo dayon kining hinungdan sa dehydration nga pwedeng mapadulong sa pagkadaot sa brain, heart, kidneys, muscles ug sa uban pang mga komplikasyon nga posibleng ikamatay. Giabisuhan usab ni Duque ang mga ginikanan nga dili pasagdan ang mga anak nga mogawas sa panimalay gikan alas-diyes sa buntag hangtod alas-kuwatro sa hapon kay diin mao kini ang pinaka-init kaayo nga sidlak sa haring adlaw.

 

– Maricris Jumalon Tumimbang / CIO