Thursday, October 29, 2020

HOTLINE ALANG SA PAGTUBAG SA MGA CONCERNS SA MENTAL HEALTH, GITAKDANG BUKSAN SA CITY HEALTH OFFICE UGMANG ADLAWA

(Miyerkoles, Ika-7 sa Oktubre 2020)

 

GITAKDANG buksan dinhi sa siyudad ugmang adlawa, Oktobre 8, ang Hotline nga motubag alang sa mga tawo nga adunay lisod nga sitwasyon dala sa sakit nga novel coronavirus disease kon Covid-19.

Kini pinaagi sa gi-set up nga hotline sa EOC Health Cluster aron matubag sa mga kabalaka sa kahimsog sa pangisip (mental health) ug psychosocial samtang nagpadayon ang pandemic nga hinungdan sa mental health distress.

Gibutyag ni Dr. Belinda Lim, Manager sa Iligan Emergency Operations Center (EOC) health cluster, sa usa ka press briefing, nga ang hotline nagtanyag tabang alang sa mga manawag nga nakasinati og kabalaka, kasubo, kalisud sa pagtulog, pagkawala sa gana, pagkawala’y paglaum, pag-huot sa dughan, pagkasuko, ug uban pang mental health ug psychosocial concerns.

Ang pag-access sa maong serbisyo inubanan sa suporta ug pakigtambayayong sa Mindanao State University-Iligan Institute of Technology Psychosocial Response Team ug sa Balay Integrated Rehabilitation Center for Total Human Development.

Ang mga numero sa hotline, nga magdagan 24/7, mahimong maabot sa 0965-429-3681 alang sa Globe / TM subscribers ug 0963-814-4001 alang sa mga Smart / TnT.

 

Maricris Jumalon Tumimbang / CIO