Pebrero 02, 2010, Martes

Gihimakak ni City Councilor Moises Dalisay, Jr. ang alegasyon sa usa sa mga tigpamâbâ sa mga kaatbang sa politika nga wala’y gihimo ang pamuno-an ni Mayor Lawrence Lluch Cruz sa pag-usbaw sa bayronon sa kuryente dinhi sa atong dapit.

Mibutyag ang Vice-Chairman sa Committee on Energy sa Sangguniang Panlungsod nga bunga sa kusganong pagsupak sa lokal nga pamuno-an ang biente dos centavos lamang nga usbaw matag kilowatt-hour imbis nga ochenta y uno centavos.

Nahimong representante sa Iligan sa maong pagpakigbisog ang Lanao Power Consumers Federation kon LAPOCOF isip usab nagrepresentar sa sektor sa mga konsumante, ubos sa pagpanguna nila ni Dra. Melchora Ambalong ug Engr. Norberto Oller nga parehong mga consultants sa siyudad.

Giklaro ni Konsehal Dalisay nga ang nahitabong mga paglihok sa LAPOCOF gipaluyohan sa nila ni Mayor Cruz, Congressman Vicente “Varf” Belmonte, Jr. ug sa mga sakop sa SP pinaagi ni Vice Mayor Henry Dy.

Subay niini, mikumpirma si Konsehal Dalisay nga iyang tambungan personal ang natakdang public hearing karong alas 9:00 sa buntag diha sa SMC-HRM Lab kalabot sa laing aplikasyon na usab sa Iligan Light and Power (ILPI) alang sa dugang power rate increase. Dumalahon kini nga pagdungog sa mga opisyal sa Energy Regulatory Commission gikan sa kaulohan. (mta)

Miduso og resolusyon si City Councilor Bayani Areola atol sa regular session sa konseho kagahapong adlawa aron pag-awhag sa Iligan City Traffic Management Office ug Philippine National Police sa hugtanong pagpatuman sa City Ordinance No. 1826, series of 1988.

Kini mao ang balaod nga nagdili kang bisan kinsa sa pagpanigarilyo sulod sa mga pampublikong sakyanan de pasahero nga naglakip sa mga PUJ, taxi o PU, bus ug uban pa.

Dismayado si Konsehal Areola sa na-obserbahan nga ‘daw sa’ wala na’y ngipon ang maong balaod sa pagkakaron. Buot niini nga mapanalipdan kadtong mga wala manigarilyo gikan sa posibleng sakit nga makuha gumikan sa wa’y pagpakabana nga pagpanigarilyo sa uban.

Gihatagan ni Konsehal Areola ang natungdang mga buhatan og pito ka adlaw aron gilayong ma-implementar pagbalik ang balaod human madawat ang kopya sa bag-ong resolusyon.

Alayon niini, midason pagduso og mosyon si City Councilor Moises Dalisay, Jr. nga lakip nga did-an kadtong mga namaligya og sigarilyo sa tunga-tunga sa kadalanan. (mta)

Naglaraw karon ang kagamhanang lokal sa Iligan nga dapiton sa usa sa mga flag raising programs ang tinun-an sa Iligan Medical Center College kinsa migulang topnotcher sa November 2009 Nursing Board Examinations.

Kini naila nga si Claire Morales Bontol kinsa nahimong numero sa 37,000 kapin ka passers sa kapin usab sa 94,000 nga mikuha sa maong pasulit.

Gitinguha sa lokal nga pamuno-an ang pagpasidungog kang Bontol kinsa naghatag og dakong dungog sa katawhan sa Iligan.

Buot usab nila ni City Councilors Orlando Maglinao ug Joe Zalsos nga mapasar sa Sangguniang Panlungsod ang usa ka “Resolution of Commendation” ngadto kang Bontol. (mta)

Gidumala ang maong okasyon sa mga personahe sa City Civil Registrar’s Office.

Sigun sa nasayran gikan sa hepe sa nahisgutang buhatan nga si Ms. Asuncion Avenido, makatutok ang ilang mga kalihukan sa dugang pagpalig-on sa nasugdan nang Barangay Civil Registration System.

Agi’g pagpahaum sa okasyon, madasigong gipaabot ni Aveindo ang mga kahimoan sa kagamhanang lokal sa civil registration sa tibuok tuig 2009. Gilangkuban kini sa pag-isyu sa 8,600 ka mga birth certificates, 1,723 ka mga marriage certificates, 1,177 ka mga marriage licenses, 525 ka mga requests for electronic indorsement and advance authentication, 158 ka mga birth decrees, 414 ka mga legal instrument, 63 ka mga correction of first names, 589 ka mga correction of clerical error, 624 ka mga certificate of no marriage ngadto sa mga indigent couples, pre-marriage counseling ngadto sa 624 sa 16 ka mga barangay, 1,304 ka mga aplikasyon sa security papers (SECPA) ug uban pa.

Ang naasoy’ng mga kalihukan ang naghatod og 1.2 milyones pesos nga dugang kinitaan sa kagamhanan sa dakbayan.

Personal nga gipabati sa gatus kapin ka mga molupyo sa Barangay Tipanoy ang ilang jingle composition alang kang Mayor Lawrence Lluch Cruz, atol sa flag raising program sa city hall kagahapong adlawa.

Unod nga mensahe niini ang kakugi’g kasibot sa amahan sa siyudad sa maligdong pagpanerbisyo sa katawhan sa siyudad.

Nangulo sa maong grupo diha sa pag-awit ug pagsayaw mao mismo ang kapitan sa nasangpit nga barangay nga si Emelie Labasano-Echeverri.

Sigun sa nasayran, nakahatag og kadasig sa katawhan sa Tipanoy ang dakong pagtagad nga nahatag sa pamuno-an ni Mayor Cruz ilabi na sa mga proyekto nga mikabat na sa kapin dose milyones ka pesos niini lamang mga tuig 2007 ngadto sa 2009.

Parehong nakaangkon og medalya ang tulo ka mga Iliganong amatuer boxers atol sa gipahigayong 2010 National New Open Boxing Championship didto sa Puerto Princesa City, Palawan niining bag-o.

Usa-usang nakaangkon og bronze medal sila si Regan Rosales alang sa 36 kilogram division, Rodel Jaudian alang sa 44 kilogram division ug Jovelito Dayday Alegarvez alang sa 42 kilogram division.

Gipresentar atol sa gipahigayong flag raising program sa city hall kagahapong adlawa ang nasangpit nga mga boksidor nila ni Dr. Usafino Obial ug City Sports Director Frederick Siao. Gihimo sa duha nga regalo sa adlaw’ng natawhan ni Mayor Lawrence Lluch Cruz ang kalampusan sa tulo ka amateur boxers.

Dungan sa maong presentasyon, gihimo ang seremonya sa pagtunol ngadto kang Mayor Cruz sa tropeyo gikan kang Misamis Oriental Governor Oscar Moreno tungod sa paggula sa Iligan nga manana-ug sa Regional Amatuer Boxing Tournament didto sa dakbayan sa Cagayan de Oro niadtong Nobyembre 13 ngadto sa 15, 2009. (boy decena)

Newswriters: Melvin T. Anggot, Diana Rose R. Cabañero, & Boy Decena

Circulation: Arthur L. Sabilla, Wilson Areola, Charito J. Tapic

MELVIN T. ANGGOT,