Nakadawat og tawag si Vice Mayor Henry Dy niadtong adlaw’ng Domiggo gikan sa pamilyang Gaisano nga madangat na ning bulana dinhi sa dakbayan ang usa ka moderno ug bag-ong firetruck unit.

Kahinumduman nga misaad ang tag-iya ug tagdumala sa Gaisano Super City Mall nga si Stephen Gaisano, nga mopalit og usa ka firetruck aron boluntaryong itabang sa Gaisano management alang sa pag-enhance sa firefighting capability sa siyudad.

          Nagtoo si City Councilor Alfredo Busico nga usa ka tinalawan nga paagi ang gihimo karon sa kaatbang sa pamuno-ang Cruz nga pagsabwag og bakak nga impormasyon gamit ang usa ka basahon nga wala’y pangalan o pirma sa tagsulat.

          Klaro, matud pa, nga tuyo lamang niini ang pagpangda-ut sa kasamtangang nakalingkod nga opisyal sa siyudad aron maka-angkon og bintaha sa politika ilabi na ning panahon nga nagsingabot na ang pili-ay.

        Mipakanaug ning semanaha og magkasunod-sunod nga mga executive orders aron mapagawas ang pundo alang sa nagkalain-laing mga road improvement ug road concreting projects sa kabaranggayan.

          Naglangkob niini ang 779 mil pesos nga road concreting sa Purok San Miguel, 676 mil pesos nga road concreting sa dalang Apitong sakop sa Doña Maria Subdivision, 620 mil nga road concreting sa Purok Bagong Silang ug 698 mil pesos nga road concreting sa Purok Tanguile nga parehong nasakop sa Barangay Tubod.

          Lakip usab niini nga mga kamandoan ang pagpaggawas sa 265 mil pesos nga pundo alang sa pag-ayo sa dalan gikan sa Old Rogongon ngadto sa Purok Bontongan sakop sa Barangay Panoroganan.

          Mokabat ang balor ang nasangpit nga mga proyekto og kapin sa tres milyones pesos nga gipundohan gamit ang 20% Development Fund sa siyudad sa mga tuig 2009 ug 2010. (mta)

        Gipamatud-an gayud ni Mayor Lawrence Lluch Cruz pinaagi sa buhat ang pasalig niini nga magpadayon ang gihatag sa siyudad nga gasoline allowance sa Iligan City Police Office matag bulan.

          Niini lamang bag-o, pormal nang gitiman-an sa pamuno-dakbayan ang usa ka executive order nga nagmando sa mga fiscal managers sa siyudad sa paggahin og 100 mil pesos matag bulan o 1.2 milyones pesos matag tuig alang sa maong katuyo-an.

          Kahinumduman nga uban sa rekomendasyon ni City Councilor Providencio Abragan, Sr., gisugdan ni Mayor Cruz niadto pang tuig 2004 ang paghatag og ayudang-pundo alang sa tubil sa mga sakyanan sa kapulisan. Tumong niini ang pagtabang sa ICPO nga mapadayon ang mga pagpatrolya matag karon ug unya alang sa pagpatunhay sa kahusay ug kalinaw sa atong dapit.

          Gikaduha-duhaan nga mapadayon ang maong programa gumikan sa pagkunhod sa pundo sa siyudad gumikan sa pagkunhod usab sa IRA share ning tuiga nga mao’y usa sa labing dako nga revenue sources sa siyudad. (mta)

          Pabiling suportahan ni kanhi Iligan City Mayor Camilo Cabili ug unang ginang Lenny Cabili ang pagdumala karon ni Mayor Lawrence Lluch Cruz sa kagamhanan sa siyudad.

          Pamahayag kini nga giluwatan ni City Councilor Alfredo Busico, kinsa personal nga nakahinabi sa nasangpit nga mga respetadong personalidad sa Iligan niini lamang bag-o.

          Sumala ni Konsehal Busico, adunay mga higayon nga buot na untang mopadayag og komentaryo sa kahanginan ang kanhi Mayor batok sa usa sa mga magpapili pagka-mayor karong bulan sa Mayo, kinsa nagpunay’g pagpangda-ut kang Mayor Cruz.

          Sa iyang bahin, gitinguha sa kanhi unang ginang nga tambagan ang mga kaatbang sa kasamtangang administrasyon nga mas makahatag og kalambo-an sa siyudad ang pagsuporta sa mga maayong tinguha ni Mayor Cruz imbis nga magtanom og pagduda ug pulos pasangil. Gani, dugang pa niya, mas maka-ayo sa Iligan ang pagtinabangay, dili ang pagsaway. (boy decena) 

Newswriters: Melvin T. Anggot, Diana Rose R. Cabañero, & Boy Decena                             

MELVIN T. ANGGOT,

In-charge, CMO-CIO