Sunday, September 27, 2020

LAING DISENYO SA MOTORCYCLE BARRIER ALANG SA MGA BACK-RIDING COUPLES, APROBADO SA NTF: DILG

(Huwebes, Ika-16 sa Hulyo 2020)

 

Gi-aprobahan karon sa National Task Force (NTF) ang lain pa nga disenyo sa motorcycle barrier o taming nga mahimo’g magamit alang sa mga back-riding couples.

Kini ang gipamahayag sa Department of Interior and Local Government (DILG) pinaagi ni Secretary Eduardo M. Año. Sumala ni Año, ang ikaduhang laraw (devise) og taming (shield) nga gi-aprubahan sa NTF gipakasama sa usa ka backpack nga gisul-ob sa drayber sa motorsiklo ug una nga gisugyot sa motorcycle taxi platform nga Angkas.

Kahinomdoman nga unang gi-aprobahan sa NTF ang disenyo sa motorcycle barrier ni Bohol Governor Art Yap nga giaprubahan niadtong milabay’ng semana.

Matod ni Año, parehas nga nagsunod sa minimum health standards nga gitakda sa Inter-Agency Task Force for the Management of Emerging Infectious Diseases (IATF-MEID) ang duha ka disenyo sa motorcycle barrier, ug mas maayo nga adunay kapilian ang publiko.

Subli usab nga gipa-klaro sa DILG nga ang back-riding gitugot lamang sa mga mag-asawa, common-law couples ug live-in partners kinsa kinahanglan magpresentar og mga ID sa Quarantine Control Points ug mga law enforcer ingon pamatuod nga sila magtiayon.

Gawas sa motorcycle shield, kinahanglan nga kanunay usab magsul-ob ang mga back-riding couples sa ilang facemask, helmet, ug sundon ang mga balaod sa trapiko.

 

Maricris Jumalon Tumimbang / CIO

 

photo credit: DILG