Saturday, July 20, 2019

MAYOR REGENCIA, GIDASIG ANG MGA MIYEMBRO SA 17TH COUNCIL SA PANAGHIUSA UG SA PAGPANDAY PA OG MGA BALAODNON ALANG SA KALAMBOAN SA ILIGAN

(Martes, Ika-9 sa Hulyo 2019)

 

GIDASIG ni City Mayor Celso G. Regencia sa pagkayab sa nasodnong bandila sa City Hall kagahapon ang tanang miyembro sa 17th council alang sa panaghiusa ug pagtinabangay alang sa pagpanday og mgadugang pang balaodnon alang sa kalamboan sa katawhan ug sa dakbayan sa Iligan. Kini ang mensaheng gihatag sa mayor sa pag-presenta sa mga bag-ong hugpong sa mga konsehal kun 17th council sa Sangguniang Panglungsod sa Iligan. Gipanghinaot ni Regencia nga mamahimong maayo ang relasyon sa matag usa sa sakop sa konseho sa pagsugod sa ilang mga trabaho. Gisaad usab sa amahan sa dakbayan nga dili siya mangilabot sa mga bisan unsa mang gimbuhaton sa Legislative Department apan hangyo usab niini nga dili usab hilabtan ang iyang buluhaton sa Executive Department. Tinguha ni Regencia nga maghiusa ang mga opisyales sa siyudad aron makab-ot ang tinuoray nga pagpangalagad ngadto sa katawhang Iliganon busa gidasig usab sa amahan sa dakbayan ang mga nagpabiling konsehal nga magpadayon sa ilang mga programa ingon man ang mga bag-ong napili nga mga konsehales sa paghimo og mga ordinansa nga makatabang sa pagpalambo sa siyudad ug maghimo sa plano, programa o proyekto aron makab-ot ang mas maayo nga kinabuhi alang sa tanan ug alang sa labing maayo nga alang sa kadaghanan.

 

Maricris Jumalon Tumimbang / CIO