Saturday, July 20, 2019

MGA ERPAT SA ILIGAN, GIPASIDUNGGAN SA LOKAL NGA PANGAGAMHANAN

(Martes, Ika-25 sa Hunyo 2019)

 

GIPASIDUNGGAN sa City Social Welfare & Development (CSWD) ug sa Committee on Social Services sa pagpangulo ni Councilor Ryan Ong ang Adlaw sa Amahan kun Erpat Day kagahapong adlawa. Kini gihimo alang sa pag-ila sa mga amahan nga nagtrabaho aron mahimong usa ka maayong tawo dili lamang ngadto sa pamilya kondili usab ang makatampo sa katilingban. Diin, sa maong adlaw, duna’y palaro o contest nga gihimo ang lokal nga kagamhanan alang sa mga erpat sa Iligan ug pinaagi sa Empowerment and Reaffirmation of Paternal Ability (ERPAT) Day, mahatagan sila og pasidungog ug maila sa katilingban. Ang ERPAT usa ka programa sa CSWD nga nagtumong sa paghisgot uban sa mga amahan sa ilang kausaban nga papel isip pangulo sa pamilya, pagpataas ug pagsabot sa mga panginahanglan sa mga bata, ug pag-ila sa kalainan tali sa mga lalaki ug babaye, ug uban pa. Sanglit ang pagka-responsable, tighatag, tigpanalipod mao ang pipila sa mga kinaiya sa usa ka maayong amahan kun erpat alang sa uban.

 

Maricris Jumalon Tumimbang / CIO