Tuesday, July 25, 2017

MGA GINIKANAN SA ELEMENTARYA UG SEKUNDARYA GI-AWHAG NI TORTOLA SA PAG-KOOPERAR SA MGA KALIHUKAN SA TULUNGHAAN

(Huwebes, Ika-6 sa Hulyo 2017)

 

GI-AWHAG ni School Division Superintendent Randolph B. Tortola ang tanang ginikanan sa elementarya ug sekundary nga mo-kooperar sa kalihukan sa anak ilabina sa natad sa gardening diin kumpolsory matud pa kini ug kinahanglan sa tanang tulunghaan sa Departmento sa Edukasyon. Matud ni Tortola daghan sa mga ginikanan ang nagbagutbut tungod sa maong kalihukan sa tulunghaan diin dili kini angay ikasuko tungod alang raman usab sa mga estudyante nga makakat-on ug madala sa panimalay ang kahibalo nga dapat mananom ug talamnon, otanon ug uban pa.

Dili matud pa suliran kung walay palibot nga katamnan tungod kung kursunada ug dunay inisyatiba mamahimo man makatanum sa mga lata o kaang aron magpabilin sa mga bag-ong henerasyon ang kinaiya sa pagka Pilipinhon. Ug dapat i-emphasize usab matud pa sa mga school principal ngadto sa mga ginikanan panahon sa PTA kon Parent’s and Teachers Association Meeting ang pagpasabot mahitungod sa mga kalihukan sa mga estudyante diha sa tulunghaan. Kinahanglan masabtan sa ginikanan ug mahibalo ang magtutudlo kung unsay angay usab masayran gikan sa mga ginikanan. Apan ang nakapait usab nga kasagara sa nagbagutbot katong mga ginikanan ra usab nga dili tigtambong sa mga panagtigum sa tulunghaan.

 

– – Bobby Capangpangan/CIO

###