Thursday, July 19, 2018

MGA TRAVEL OPERATORS O TRAVEL AGENCIES, MISUGYOT NGA IHATAG NA LAMANG NGADTO SA TOUR GUIDE ASSOCIATION SA ILIGAN ANG PAGGIYA SA MGA TURISTA SA DAKBAYAN

(Huwebes, Ika-12 sa Hulyo 2018)

 

GISUGYOT sa mga travel operators kon travel agencies diri sa dakbayan nga ipasa ug ihatag na lamang ngadto sa tour guide association sa Iligan ang serbisyo kalabot sa paggiya sa mga turista sa atong dakbayan, human gi-imposar ang usa ka libo nga bayad sa serbisyo ngadto sa usa ka tour guide gikan sa City Hall pinaagi sa proposed ordinance ni Konsehal Sorilie Bacsarpa, hepe sa Committee on Tourism. Sumala sa mga travel operators, atul sa nahigayong 2nd public hearing kalabot sa nasangpit nga ordinansa, nga dili na kinahanglan mag pull out ug tawo gikan sa City Hall aron himuong tour guide. Kay diin aduna’y assosayon ang siyudad sa Iligan sa mga tour guide nga puwedeng makatanyag sa ilang serbisyo. Gidugang usab sa mga travel operators nga puwedeng dili maka-focus ang usa ka empleyado sa LGU kung i-pull out pa kini sa oras sa iyang trabaho aron lamang maggiya sa turista sa dakbayan. Busa, kalabot niini, gipasabot ni Bacsarpa nga ang gisugyot niining ordinansa, basehan lamang kung pila gayud ang kantidad nga bayaran sa turista alang sa serbisyo ngadto sa usa ka tour guide ug aron usab maproteksyunan kini. Diin matud pa, dili usab isyu kung sa City Hall gikan ang maong tour guide o gikan man sa mga travel agencies diri sa dakbayan basta ang importante miagi gayud kini sa usa ka bulan nga tour guiding training ug seminar sa Department of Tourism ug accredited kini sa maong ahensya.

 

– Maricris Jumalon Tumimbang / CIO

###