Saturday, November 18, 2017

ORDINANSA ALANG SA MGA KABATAAN, APRUBADO NA

(Martes, Ika-11 sa Hulyo 2017)

 

APRUBADO na sa Sangguniang Panlungsod sa Iligan ang ordinansa nga naghatag og importansiya alang sa mga kabataan sa dakbayan. Matud pa ni Konsehal Sol Bacsarpa nga pinaagi sa Youth Code, mamugna na ang Local Youth Development Council ug mahatagan og kahigayonan ang mga kabataan nga dunay magdala sa ilang tingog ngadto sa nagkalain-laing sektor sa katilingban.

“Importante kaayo ang representation sa mga kabataan ilabina ngadto sa dga policy-making body nga mo-mugma sa youth development program,” pamahayag ni Bacsarpa. Tungod niini, mahatagan na usab ang mga batan-on nga adunay nahimong dungog sa Iligan ug ma-rekognisar pinaagi sa mugnaon nga ‘The Outstanding Youth of Iligan’.

“Nakalatid usab sa maong ordinansa ang pagpahigayon og Youth Congress matag duha ka tuig, aron maandam ang youth agenda nga i-presentar ngadto sa mayor ug ngadto sa SP,” miingon si Bacsarpa, kinsa maoy Committee Chairperson on Youth sa konseho.

Nakalakip sa maong gipasar nga balaod ang pag-institutionalize sa environment campaign nga pangunahan sa mga kabataan.

Pinaagi usab sa Youth Code, ipanga-rehistro ug ipang-accredit na ang tanang mga organisasyon sa kabataan. “Tuyo usab nato ani nga ma-account ang mga youth organizations sa Iligan ug makapangayo sila og suporta sa kagamhanang lokal pinaagi sa Youth Affairs Office,” dugang sa konsehal.

Ang Youth Code nagsunod sa National Youth Commission nga ang maong sektor sa kabatan-onan nagpangidaron og 15 ngadto sa 30 anyos.

 

– – Office of Councilor Sorilie Bacsarpa

###