Thursday, August 22, 2019

PAGLUNSAD SA MGA EDUCATIONAL MATERIALS LABOT SA EARLY WARNING ALANG SA PAGREDUCE SA DISASTER RISK

(Huwebes, Ika-9 sa Mayo 2019)

 

GILUNSAD kagahapong adlawa didto sa Iligan Ethnic Center ang matulun-anong materyales labot sa mga tilimad-on kun early warning sa pagreduce sa disaster risk. Kini gipresenta sa Success Initiatives Inc., nga gipangulohan nila Engr. Cesar Yamuta ug Anita Sescon uban sa Tuklas Innovation Labs ug sa lokal nga pangagamhanan. Tumong sa maong kalihokan nga mahibalo ang katawhan ilabi na ang mga kabatan-onan ug mga kabataan labot sa mga pagpangandam kung adunay moabot nga katalagman. Layon sa Success Initiatives nga maski sa sayo pa nga mga pangidaron sa mga kabataan, masayod na kini sa mga pagpangandam. Gipresenta sa maong organisasyon ang mga educational materials sama sa nursery songs, rhymes ug videos nga gihimo ni Cesar Padilla nga nagapakita sa mga tilimad-on gamit ang mga hayop sama sa hulmigas, langgam, ilaga, ug uban pa aron dali ra makabisado, makakabig ug maka-attract ug atensiyon sa mga bata. Nagtuo ang maong mga ahensiya nga pinaagi sa maong mga materyales, dali ra masabtan sa mga kabatan-onan ilabi na sa mga bata ang mensahe labot sa pagpangandam sa mga posibleng mahitabong mga katalagman.

 

Maricris Jumalon Tumimbang / CIO