Saturday, November 18, 2017

PUGAAN ELEMENTARY SCHOOL HULIPAN UG LAING NGALAN

(Biyernes, Ika-10 sa Nobyembre 2017)

 

USA ka makuting pagtuki niadtong milabay’ng adlaw atol sa gipahigayong public hearing sa SP Session Hall kabahin sa planong paghulip ug laing ngalan sa Pugaan Elementary School. Sumala pa nga dunay sugyut ang barangay council sa Brgy. Pugaan nga hulipan ang ngalan sa maong tunghaan ngadto sa nagdonar sa luna nga si Juan B. Tabla nga himoon usab nga Juan B. Tabla Elementary School. Sumala pa ni Mr. Rodrigo Rozas ang School Principal sa maong tunghaan nga usa sa anak ni Mr. Juan Tabla ang mihangyo ngadto kanila nga hulipan unta sa ngalan ngadto sa iyang amahan ang  Pugaan Elementary School isip pagtahod usab nga sila ang midonar sa maong luna. Apan gipasabot ni Mr. Rozas nga kinahanglan mo-agi usab sa saktong proseso ang paghulip sa maong ngalan sa tunghaan.

Samtang dako ang pasalamat ni Konsehal Eric Capitan nga maoy nangamahan sa maong plano tungod kay angayan usab nga tahoron ang tawong midonar sa maong luna apan supak niini ang pipila ka mga sakop sa konseho sa Brgy. Pugaan nga mitambong sa maong public hearing. Gitakda na usab sa laing adlaw ang sunod nga public hearing kabahin sa maong isyu.

 

– – Bobby Capangpangan/CIO

###