Sunday, February 23, 2020

‘TASK FORCE TO END ARMED CONFLICT’ GILUNSAD SA DAKBAYAN

(Miyerkoles, Ika-18 sa Disyembre 2019)

 

LGU-ILIGAN CITY — Sa tinguha nga matapos na ang insurhensya sa nasod , pormal nang gilunsad ug malamposon nga napahigayon sa lokal nga pangagamhanan ang City Task Force to End Local Communist Armed Conflict (CTF-ELCAC) sa Iligan sa tabang sa Komunidad sa Lumads sa Sitio Limunsudan, Barangay Rogongon ning dakbayan, Disyembre 3 ning tuiga.

Ang maong “Serbisyo Caravan” usa ka kalihokan sa lokal nga kagamhanan isip tipik sa pagsaulog sa Week of Peace sa siyudad diin ang tanan nga mga ahensya sa gobyerno magtinabangay uban ang lainlaing mga Non-Government Organizations (NGOs) aron magdala og lainlaing serbisyo sa katawhan. Gipamunoan ni Acting Mayor Jemar L. Vera Cruz, ang maong kalihokan sanglit naka-on-leave ang amahan sa dakbayan nga si Mayor Celso G. Regencia.

Kini ubos usab sa pasiugda ug paningkamot ni Konsehal Ian Uy, kinsa mao ang Chairman sa Committee on Peace & Order, Security sa hawanan sa konseho sa dakbayan.

Lakip nga misaksi ug misalmot sa maong kalihokan ang mga konsehales sa siyudad , mga department heads, barangay council sa Rogongon, mga lideres sa nagkadaiyang cluster o barangay ingon man ang opisyales sa national nga mga ahensiya nga sila DILG Regional Director Arnel M. Agabe, PNP Regional Director PBGEN Rolando B. Anduyan, r2nd Mechanized Infantry Brigade Commander, Armor Division Philippine Army BGEN Facundo O. Palafox IV, PNP- Iligan City Police Office, City Director PCOL. Michael Pareja, ICPO-Police Station 4 OIC PMAJ Abogadi P. Mautin Jr. uban sa kasundalohan, kapulisan ug ubang stakeholders.

Pinaagi sa maong kalihokan , malamposon usab nga gihatod ang mga batakang serbisyo sa lokal nga gobyerno sama sa medical check-up, libre nga tambal, libreng alot sa buhok, pagtudlo pagdalit og story-telling sa mga kabataan, paghatag sa  mga relief goods, bugas ug uban pang programa sa sosyo-ekonomiko diin ang makabenepisyo niini mao ang komunidad kinsa apektado sa pag-alsa sa walhong grupo sa NDF-CPP- NPA batok sa Gobyerno sa atong nasud sa Pilipinas.

Ang maong paglunsad sa CTF-ELCAC gipailalom sa direktiba sa atong Pangulong Rodrigo Roa Duterte sa pagpatuman sa Executive Order No. 70, paglig-on sa ‘Whole of Nation Approach’ nga gitagaan og pagtagad sa mga opisyales sa dakbayan sa Iligan pinaagi sa seryosong pagserbesyo sa katawhan alang sa kauswagan ug sa pagkab-ot sa malungtarong kalinaw.

 

Maricris Jumalon Tumimbang / CIO