Friday, June 05, 2020

TRABAHANTE ALANG SA TUKORONG BAG-ONG PALA-O MERKADO PUBLIKO GITUKI

(Martes, Ika-5 sa Marso 2020)

 

SANGGUNIANG PANLUNGSOD — Gituki sa mga hingtungdang ahensiya sa lokal nga kagamhanan pinaagi sa panagtigom diha sa Sangguniang Panlungsod Session Hall, Marso 4, 2020,  ang pangempleyo o trabaho alang sa tukorong bag-ong Pala-o Public Market. Kini ubos sa pagpanguna ni City Councilor Demosthenes Plando, Committee Chairman sa Labor & Employement ug Laws & Rules sa hawanan sa konseho.

Diin sa maong panagtigom, gihisgotan sa mga representante sa nagkadaiyang buhatan sama sa City Engineer’s Office, Permits and Licenses Division ug City Mayor’s Office ang City Ordinance No.19-6849 kon “Prioritization of Iligan City Residents for Manpower Employment (PIRME)”, isip basehan sa pangempleyo o pag-hire og empleyado.

Sumala ni Konsehal Plando, base sa ordinansa, una nga prioridad ang nagpuyo sa Barangay Pala-o, asa pinakaduol nga barangay sa nasangpit nga proyekto. Ikaduha, ang mga nagpuyo sa adjacent barangays sama sa Barangay Mahayahay ug Ubaldo Laya, ug ikatulo ang ubang kabarangayan diri sa dakbayan.

Gani, gipamahayag ni Plando ang mga impotanteng rekisitos sama sa Certificate of residency gikan sa barangay ilabi na ang Voter’s registration Certificate gikan sa Comelec, aron sa pagmatuod nga konstituwente sa dakbayan sa Iligan ang aplikante. Gibutyag usab sa konsehal nga ang pagkuhag trabahador alang sa merkado publiko, pagalangkoban sa 50% unskilled workers ug 30% skilled workers nga gikan diri sa Iligan.

 

Maricris Jumalon Tumimbang / CIO