Saturday, July 20, 2019

VICE-MAYOR VERA CRUZ, MIPASALIG NGA DILI MAMAHIMONG RUBBER-STAMP ANG SANGGUNIANG PANLUNGSOD NI CITY MAYOR REGENCIA

(Martes, Ika-9 sa Hulyo 2019)

 

GIPASALIG ni Bise-Mayor Jemar Vera Cruz atol sa pagkayab sa nasodnong bandila kagahapon ug sa pagpresentar sa mga miyembro sa 17th council nga dili mahimo o mamahimong rubber-stamp ang Sangguniang Panlungsod sa Executive kun ni City Mayor Celso G. Regencia kini human nga adunay mga hungihong diha sa social media ug sa ubang radio station. Sumala ni Vera Cruz nga usa ka independent body ang Sangguniang Panlungsod ug buhaton nila ang unsay gimando sa balaod isip giboto ug gipili sa katawhan. Apan nagtuo usab kini nga kinahanglan adunay panaghiusa ang Executive ug ang Legislative aron makab-ot ang tinguha nga mahatagan og maayong serbisyo ang katawhang Iliganon. Busa gitino sa bise-mayor nga suportado nila ang mga programa sa mayor ug mao usab ang ilang programa sa Sangguniang Panglungsod kung kini alang sa kaayohan sa katawhan sa Iligan. Gidasig usab ni Vera Cruz ang tanang miyembro sa 17th council nga maghiusa alang sa serbisyo publiko nga nagpasabot sa paghimo sa kinabuhi sa katawhan nga luwas, mauswagon, komportable, ingon man malipayon sa mga gibuhat sa mga opisyales sa dakbayan.

 

Maricris Jumalon Tumimbang / CIO