Sunday, August 14, 2022

BAG-ONG IMPROBAR NGA ANAHAW AMPITHEATER, GI-TURNOVER SA LOKAL NGA KAGAMHANAN

(Miyerkoles, Ika-6 sa Abril 2022)

 

ILIGAN CITY – PORMAL nang gi-turnover sa Mamsar Construction & Industrial Corporation ngadto sa lokal nga kagamhanan ang hingpit nga naayo ug na-improbar nga Anahaw Amphitheater sa siyudad karong Miyerkoles sa buntag, Abril 6, 2022.

Usa kini ka makasaysayanong proyekto nga nahimo sa kasamtangang administrasyon human nga daghang na-agiang mga babag ug suspension order kalabot sa pag-improbar niini.

Kung kahinumdoman, niadtong Mayo 2021, aduna’y Petition for Issuance of Temporary Environmental Protection Order nga gisang-at batok kila Mayor Celso G. Regencia, Vice- Mayor Jemar L. Vera Cruz ug sa contractor tungod sa pag-improbar sa amphitheater apan gi-denied kini ni Judge Ali Ombra R. Bacaraman tungod sa hinungdan nga kulang og basehan (lack of basis).

Tungod niini, mas desidido ang administrasyon nga ipadayon ang naasoy nga proyekto sa tumong nga mas presentable, maanindot, hamugaway ug luwas ang maong pasilidad alang sa katawhan.

Ang pag-improbar sa Anahaw Ampitheater adunay gahin nga P18,334,918.00 gikan sa Department of Budget & Management (DBM) pinaagi sa Local Government Support Fund (LGSF) Assistance to Cities in FY2019 General Appropriation Act (GAA).

Ang Anahaw Ampitheater host, sa daghang mabulokon nga kultural ug sosyal nga mga kalihokan sa mga Iliganon sa daghan nga mga katuigan. Gikapasigarbo kini isip ‘the largest OPEN amphitheater’ sa Mindanao.

 

Maricris Jumalon Tumimbang / CIO