DATE :Mar 03, 2026

Gi-awhag sa City Health Office (CHO) ang mga residente sa Iligan nga i-obserbar ang 4S aron malikayan nga mataptan og dengue. Kini tungod duna nay 10 ka kaso sa dengue ang Iligan. Ang mga pasyente gikan sa Barangay Tibanga, Tubod, Suarez, Tambacan, Palao, ug Maria Cristina.

Ang 4S naglangkob sa pagpangita sa mga breeding places o mga lugar nga kapangitlogan sa mga lamok ug iyabo, pag-gamit og mga proteksyon sama sa insect repellant ug mga sinina nga taas og bukton ug karsones, magpakonsulta dayun sa ospital kung dunay mga sintomas sa dengue, ug suportahan ang fogging ug spraying sa mga lugar nga taas og kaso sa dengue.

Pahimangno sa CHO, apil sa mga sintomas sa dengue ang balik-balik nga hilanat, sakit sa ulo, sakit likod sa mata, panurok, pagkalipong ug pagsuka, ug panakit sa lawas. Samtang warning signs sa dengue ang grabeng sakit sa tiyan, sige og suka, pagkaluya, pagdugo sa lagus o kaha ilong, dugo sa suka o hugaw, ug dili ka-ihi sa unom ka oras. Sumala sa CHO, ang tawo nga dunay warning signs posibleng makasinati og mga komplikasyon. Ang pagkanaug sa hilanat dili sinyales sa pagka-ayo sa dengue, Gi-awhag nga magpakonsulta dayun sa ospital o pinakaduol nga health center.

Gilauman ang pagsaka sa kaso sa dengue human sa pag-ulan-ulan, bagyo, ug baha tungod sa nahabilin nga tubig sa palibot.