DATE :Jan 20, 2026

Gidawat sa Vanitea Cafe ang Halal Company Certification gikan sa Fiqh and Halal Council of the Philippines, Inc., Enero 19, 2026. 

Ang Vanitea ang ika-upat nga establisyamento sa Iligan nga Halal-Certified. Nagpasabot nga ang Vanitea walay Haram nga pagkaon, ingredients, ug nasunod ang Halal requirements sa Islamic Law uf World Halal Standards. Balido ang sertipikasyon hangtud tuig 2027. Ang Vanitea Cafe anaa sa 2nd Floor sa Pegalan Tailoring sa M. Obach St. sa Brgy. Poblacion, Iligan.

Sumala sa tag-iya nga si Rasmia M. Maca-agir, ang Halal dili lamang nagpasabot nga walay pork sa ilang pagkaon, apan nag siguro kini nga limpyo ang pagkaon gikan sa ingredients, preparasyon, ug bisan ang ilang mga gamit. 

Gipangusgan ni Princess Almerah D. Lucman, ang Provincial Head sa National Commission on Muslim Filipinos (NCMF) Iligan City Field Office, nga ma-certify sab ang mga small ug medium enterprises. Alayon kini sa panlantaw ni Mayor Frederick Siao nga dunay halal options sa Iligan alang sa Muslim Community. 

Dungan nga nahatagan og Halal Certification karung adlawa ang King’s Pizza atbang sa Robinson’s Mall. 

Sumala ni Darwin Manubag, ang City Administrator, plano sa LGU nga maghimo og brochure sa tanang halal-certified nga mga kan-anan sa Iligan aron ma-promotar sa mga bisita sa Iligan.

Gipasalamatan ni Lucman si FIQH Aleem Shahani D. Mustapha, M.A, D. Hum, ang Presidente sa Fiqh and Halal Council of the Philippines kinsa nanguna sa pag-inspeksyon ug proseso sa pag-certify.

Mitambong sab sa paghatag og certification si DTI-Lanao del Norte Director Jane Tabuclin, Naz Mangoranda, ang Officer-in-Charge sa Office of the Muslim-Higaunon Cultural Center ug mga staff, ug Anita Cipriano sa Halal Council.