DATE : Feb 26, 2026

Subay sa DepEd Order No. 22, s. 2026, nga giya sa pagsuspende sa mga klase ug trabaho sa mga eskwelahan panahon sa katalagman, emerhensiya, ug susamang kahimtang, dili kinahanglan nga ipatuman ang pagsuspende sa mga klase sa tibuok dibisyon kon ang hulga o emerhensiya nakaapekto lamang sa piho nga mga barangay o komunidad. Ang pagsuspende ipatuman lamang sa mga lugar nga aktuwal nga apektado.

Kung adunay pagbaha, grabeng samok sa panahon, kadaot sa imprastruktura, pagkaputol sa kuryente, hulga sa kaluwasan sa publiko, o susamang kahimtang nga nagbutang sa peligro sa pag-eskwela, ang pagsuspender sa klase ipatuman lamang sa apektadong barangay o school catchment area.

Ang tanang School Heads gimandoan sa pakigkoordinar sa ilang tagsa-tagsa ka Punong Barangay aron masusi ug mapamatud-an ang aktuwal nga kahimtang sa lugar. Lakip niini ang kahimtang sa mga dalan, kaluwasan sa mga estudyante ug kawani, ug ang kinatibuk-ang risgo sulod sa barangay. 

Mokuha og opisyal nga sinulat nga komunikasyon, sertipikasyon, o situational report gikan sa Punong Barangay isip basehan sa pagrekomenda o pagpatuman sa lokal nga pagsuspende sa klase.

Ipahibalo dayon sa Opisina sa Schools Division Superintendent, pinaagi sa Public Schools District Supervisor, ang bisan unsang girekomenda o gipatuman nga lokal nga pagsuspende. Kinahanglan klaro ang legal ug tinuod nga basehan, ug ilatid ang mga barangay, grado, o eskwelahan nga apektado.

Siguruhon nga walay estudyante, magtutudlo, o non-teaching personnel ang motungha sa eskwelahan kon ang kahimtang sa ilang barangay nagbutang og peligro sa ilang kaluwasan ug kaayohan.

Gi-awhag usab ang pagpatuman sa angay nga alternative delivery modes of learning, kon mahimo, aron masiguro ang padayon nga paghatag sa serbisyo sa edukasyon panahon sa pagsuspende, subay sa kasamtangang mga polisiya sa DepEd.

***Mi-abiso sab ang Incident Commander sa Incident Managament Team sa mga Punong Barangay nga mangunay na pagkoordinar sa mga Prinsipal.