DATE : Feb 26, 2026

Miboluntaryo si Phyllis Namocatcat, usa ka residente sa Iligan, paglimpyo sa Barangay Tambacan human nabahaan ang dapit. Sumala niya, dili sayon ang makasinati og kalamidad busa importante ang pagtinabangay aron mapadali ang pagbangon mga apektado.

Samtang nahimo sab nga Public Information Officer sa Emergency Operations Center (EOC) si Manticao Municipal Disaster Risk Reduction and Management Office Assistant Divina Suson, gawas nga mipadala og heavy equipment ang ilang munisipyo aron makatabang sa clearing operations. 

“Dili lang tungod kay naay Memorandum Of Agreement ang LGU Manticao ug LGU Iligan nga magtinabangay in times of calamity busa naa mi mitabang but tungod kay nakita namo nga kinahanglan jud mi motabang kay silingan raman gud nga LGU. Busa mipadala og  resources sa amoang mayor, si Mayor Stephen Tan,” sumala niya. 

Lakip sab sa mga nauna nga mi-responde ang lungsod sa Tubod nga mipadala og Medical Team ug Urban Search and Rescue Team, gipangunahan sa ila mismong DRRM Officer nga si Vicmar Pancho Paloma. Sumala ni Tubod Mayor Dionisio Cabahug, nagsumikad ilang pagtabang sa panaghigala sa Tubod ug Iligan, ug sa pagtabang sab sa Iligan kanila sa mga nangagi nga kalamidad.

Medical team sab ang gipadala sa lungsod sa Matungao, ug nahimong Planning Section Chief sa Incident Management Team dinhi ang ilang DRRM Officer nga si Jalil Ludag. 

Gipadala usab sa ilang matag LGU ang mga DRRMO heads sa Kapatagan, Sapad ug Sultan Naga Dimaporo, Lanao del Norte aron makatabang sa gihimo nga Rapid Disaster Assessment and Needs Analysis (RDANA). Human sa RDANA, mitabang si Kapatagan DRRMO Joy Dela Torre sa operasyon sa EOC.

Pipila lang sila sa gatusan ka mga volunteers ug mga lungsod nga mitubag sa dakong panginahanglanon sa Iligan sa ilang kahanas, kagamitan, manpower, ug ubang mga rekurso. 

Ang LGU-Iligan dunay gilahi nga higayon ug espasyo sa pagpasalamat sa tanang mitabang sa syudad.

[Pebrero 25, 2026| LMN]