DATE : Feb 05, 2026

Gilauman nga mabati ang impact sa bagyong Basyang sa Iligan ug Lanao del Norte sa Huwebes sa udto, Prebrero 5, 2026, ug sa adlawng Biyernes, Pebrero 6. Kini base sa pinakaulahing update sa PAGASA atol sa Pre-Disaster Risk Assessment (PDRA) nga gipahigayon alas 8:00 karung gabii kauban ang Incident Management Team ug kabarangayan.

Sumala ni Michael Mar Demecillo, ang Weather Specialist sa PAGASA, ang Iligan makasinati og mapanganuron nga kalangitan, katag-katag nga pag-ulan ug pagpanalugdog. 

Light to moderate ang kakusgon sa hangin nga paingon sa dereksyong Amihanang-Sidlakan ug Amihanan. 

Dugang niya, sa pagka-karun arang-arang pa ang balud sa kadagatan apan dili angay nga magkumpyansa.

Hangtud ning pagsulat, wala pay wind signal ang Iligan.

Sa Pebrero 6, 2026 na gilauman nga pinakaduol ang TD Basyang sa Iligan, ug magdala kini og 50-100mm nga pag-ulan. Posible ang pagbaha sa mga ubos nga dapit, mga lugar duol sa sapa, ug pagsaka sa tubig sa Mandulog ug Iligan River. Posible ang pagsaka sa tubig sa suba sa barangay Tubod tungod mabaw kini, nga makaapekto sa Barangay Mahayahay, Tubod, ug Palao.

Gipasabot ‘sab sa PAGASA nga kung hinay ang dagan sa bagyo ug magdugay kini sa dagat, posibleng mokusog kini ug mahimong Tropical Storm.

Gilauman nga sa Sabado, wala na sa Iligan ug Lanao del Norte ang bagyo, ug padulong na kini sa West Philippine Sea base sa model analysis sa PAGASA