Gipahigayon sa Committee on Agriculture and Food sa Konseho sa Iligan ang unang public hearing sa ordinansa nga maghimo og African Swine Flu (ASF) Task Force ug Technical Working Group nga mo-implementar niini.

Sumala ni Konsehal Samuel “Tatay” Huertas, kinahanglan ang ordinansa aron madeklara nga ASF-free ang syudad. “Gikinahanglan ang ordinansa aron masiguro nga ma-implementar ang mga protocol ug para ma-clear gyud ta sa ASF,” sumala niya.

Dugang niya, mabalik ang kalagsik sa hog-raising industry sa syudad kung ma-deklara kini nga ASF-free tungod makahatag ang deklarasyon og kompyansa sa mga konsumante.

Sumala kang City Veterenarian Dr. Dahlia Valera, niadtong Hulyo 28, 2022 pa sila nagbutang og sentinel sa barangay Pugaan, Digkilaan, Mandulog ug Mainit diin mikuyanap ang ASF tulo ka tuig na ang nakalabay. Tumong niini ang pagsusi kung mataptan pa ang mga baboy og ASF, apan matud ni Dr. Valera, nakapasanay na sa baboy ang mga namuhi niini. Dugang niya, indikasyon kini nga wala na ang virus sa dapit.

Gipasalamatan ni Allan Siao, usa sa mga nanag-iya og piggery sa syudad, ang Lokal nga Kagamhanan sa tabang niini nga makabangon ang mga negosyante nga naapektohan sa pagkuyanap sa ASF . Gitataw niya nga dako kinig mahimo aron mapalambo ang ekonomiya sa syudad.

[CIO]