Gipaminaw sa Lokal nga Kagamhanan ang mga yangongo sa mga nananom og kape sa Iligan, mga traders ug consolidators, ug coffee shop owners atol sa bag-o lang gipahigayon nga Coffee Industry Summit sa City Agriculturist’s Office. Lakip sa ilang gipahayag ang mga hagit sa produksyon, dalan ug mga gikinahanglan nga trainings.

Mitambong usab ang mga ahensya sa lokal ug nasudnong kagamhanan, ingon man mga NGO nga makatabang kanila. "Dugay na namo nga pangandoy nga among barangay maku-an og dalan. Basin naay ikatabang sa gobyerno," sumala sa mag-uuma nga si Jinbor Somocor nga taga barangay Panoroganan.

Atol sa Summit, gi-mugna ang Ad Hoc Committee nga maoy motabang sa pagpalambo sa patigayon sa kape sa Iligan. "Paningkamutan ani nga maka-porma og development plan roadmap for coffee in Iligan City para makapadayon sa next step sa atong intervention sa coffee industry, " matud ni Kevin Fernan, LGU Focal person sa Agrikultura.

Sa Barangay Panoroganan dunay 900 hectares sa standing crop nga kape . Idugang pa ang mga Barangay Rogongon, Mainit ug ubang hinterland barangays nga ga-uma og kape.

(Ronnie Enderes/CIO)